Wednesday, July 24, 2019

කර්ණකලාදුරු විනිර්මුක්ති සැමරුම!

කර්ණකලාදුරු විනිර්මුක්ති සැමරුම!
හැඳින්වීමේ කතාව.
දැනට සති එකහමාරකට කලින් හෝ ඊට කීප දවසකට කලින් හෝ සිද්ධ වුණු සිදුවීම් සන්තෑසියක් නිසයි, මේ සැමරුම පවත්වන්නේ.
මගේ "දිය" නෑමෙන්, මා නා ගත් වැඩකි මේක.
දියාණෝ!
"දිය" ඕනෑ එකටත් එපා එකටත් අවශ්‍යම කෙනෙක් වුණායින්, ශරීරයේ සියළු පාර්ශවයන් ස්පර්ශයට ද, තුමූ ස්ව-කැමැත්තෙන්ම සහභාගී වූහ. එහෙයින්, දියඇලි නොමැති ලෝකයේ ශවරයක යට දිය නෑමකට ලක්වීමි.
වංගු ලතා ලලනාංග රිද්මයානුකූල ස්පර්ශය මතු නොව, මේකා ශරීරාභ්‍යන්තර සංචාරයක් ද මේ සමඟ නොමිලේ කරන්නට ගොස් කළ වින්නැහියකුයි, මේ කතාන්තරයේ හේතු කතන්දරය!!
කර්ණය!
මුඛය හැරුණු කොට ශරීරාභ්‍යන්තර සවාරියකට ඉතා හොඳ, කෙටි මඟක් නම් කර්ණයයි. දියාණෝ, නෑ අවසරෙන් තම සංචාරය ද නොමිලේම කර ගත්හ. දිය නෑමෙන් පසු දැඩි හිරු උණුසුමට ඇඟේ තෙත වේලී ගිය ද, අප දියාණෝගේ කර්ණය හරහා කළ සංචාරයේ 'තෙත පිරි' මං සටහන් නම් කන තුළ, එතැනම ය!
හතු!
හතු පිපෙන්නට තෙත නොවෙද හොඳ ම තැන? තෙතක් ඇත්තේ කොතැනද - හත්ත ඇත්තේ එතැන ය! ඉතින් පිපුණි හතු! කන තුළ! තෙත ගොඩේ! තෙතබරිත සංචාරකතැනගේ සංචාරක මඟ දිගේ!
හත්තෙ ලස්සන නොදුටිමි. වේදනාව නම් ඉවසුවෙමි. කන කස කසා, කැණීමේදී හතු කෑලි දුටිමි. හතු දුටු පසු දකින්නට ලස්සනක් නොතිබුණි. අනිච්චේ දුක්කේ'යි හොඳටෝම සිතුවෙමි.
'පිළිගැනීමේ' කතාව.
කනක මහිමෙ තේරුණෙ නෑසුණ දා ය
හනික ගමනෙ වැටුණෙ, සමබර නැති වී ය
කනක තිබුණෙ සමබර ඇවිදින ගුණ ය
පයක ගමනෙ යන්ට කන් දෙක ඕනෑ ය
ඉතින් පිළිගනිමි. නොවැටී ගමනක් යන්න දෙකනේ බැලන්ස් එක ඕනෑ-ම බව. කන ද දෙපයද බැතියෙන් පිළිගනිමි!අසමබර ව අබලන් වුවත්, වම් කකුලේ, නුඹ වටී මට!
ස්තූති කතාව සහ සැමරුම.
ඒ තමයි දවස! කර්ණකලාදුරු විනිර්මුක්ත දිනය!
වේදනා සංඥාව අහේතුකව වැඩීම නිෂ්පල නිසාවෙන්, ප්‍රතිකාර සොයා ගියෙමි.
දොස්තර තැන, හතු කිතූ කිතූ කොට ඉවතට ගන්නා ලදින් සැනසීමක් ලැබිණි.
"දැන් ඇසෙන්නේදැ"යි දොස්තරගේ විමසීමෙන් ඇහුම්කන් දුන්නෙමි. කුරුලු ගී නම් නො-ඇසුණි. ගස් සෙළවෙන සිලිසිලිය නො-ඇසුණි. මිනිස් බැන ගැනීම් ඇසුණි. සිව් දෙසින් රට කැඩෙන හඬ නම් ලෙසට-ම ඇසිණි. එහෙනං ඉතින්!
"අපොයි ඔව් ඩොක්! දැන් කලින් වගේම හොඳටම ඇහෙනවා!"
අහෝ එ-සනීපය! හතු ඉවත්කිරීමේ ප්‍රීතිය! කර්ණ කලාදුරු නොහොත් හත්තෙ විනිර්මුක්තික ප්‍රීතිය!
සැමරීමට ගියෙමි ඔසු ස්ටෝර්ස්. ගත්තෙමි හොඳවයින්, කන්බේත් කුප්පියක්; තව දින හතකට බේත්.
එහෙනම් සමරමු!
"කර්ණකලාදුරු විනිර්මුක්තයේ සැමරුම!"
සුව වේවා! සුව වේවා!! සැම සුවපත් වේවා!!
එසේනම් ඔබට දික් කර
ඕං මං බොනවා, බේත් ටික!
"දිය" ජෝගුවක් ගෙන උගුරට දෙකට!
ග්ලබ්! ග්ලබ්!
ගුඩුස්!
ෂුෂ්- ඈ!
_________"අනේ ඉතින්.. 'දිය' කළ විපතට, 'දිය' ම ආවේය පිහිටට!" කෝප්පතැන සැමරීම නිමා කරන එ-වදන් මාත්‍රය කෙඳිරී ය - හෙමිහිට.
සැමරීම නිමියේ ය.

No comments: